Furðuleg framvinda í Grikklandi.

Hugsanlega varð samt að ganga þessa leið úr því sem komið var.  Þ.e.a.s. að undanfarin ár hefur verið gríðarlegt lýðskrum og óraunsæi í pólitískri umræðu.  Uppleggið sem vinsælast var snerist um að skuldirnar væru nokkurskonar plat og það þyrfti ekkert aðhald í ríkisfjármálum.  Ein meginstoð í boðskap Syrisa flokks var að flest lönd í Evrópu væru í raun sammála þessu.  Yfirgengilegt skrum og hreinlega röngum upplýsingum haldið að fólki.  Því ekki þarf lengi að lesa sig til um þetta mál til að átta sig á að margar stjórnir í Evrusambandinu eru frekar á móti aukinni aðstoð við Grikkland auk þess sem það lá fyrir að ein af mest áberandi kröfum Grikkja, skuldaniðurfellingarkrafan, - að hana var ekki hægt að framkvæma á þann hátt sem grikkir vildu.  ESB löggjöf kemur í veg fyrir það.  En þessa leið óraunsæis og skrums fer Syrisa-Anel stjórnin alveg fram á blábrún með talsverðum skaðakostnaði.  Niðurstaðan núna ljós.  Það sem grikkir vildu var í meginatriðum ekki hægt að gera og það lá í raun alltaf fyrir.  Hvernig framvindan verður svo eftir þetta er erfitt að spá fyrir um.  Maður skyldi alveg eins halda, miðað við undanfarin misseri, að þetta gæfi ýmsum óróaaöflum tilefni til að láta til sín taka.  Ljóst er að nú reynir mjög á Tsipras.