Guðmundur byrjar vel sem landsliðsþjálfari dana í handbolta.

Tveir sigrar í undankeppni Evrópumóts.  Fyrst öruggur sigur á Litháen og í kvöld sterkur útisigur á Bosníu 23:25.    

Þeir danir fylgjast grannt með framvindu mála, eðli máls samkvæmt.  Talið er í Danmörku að ákveðin grunnbreyting fylgi Guðmundi frá fyrrverandi þjálfara sem var dani og hafði verið lengi.

Fyrrverandi þjálfari lagði aðal áhersluna á spil eigin liðs og það átti að duga.   Þ.e. ef danir léku sinn leik og einbeittu sér að því - þá kæmi árangurinn af sjálfu sér, má segja.

Guðmundur hinsvegar er mun fræðilegri í nálgun á leikina.  Nálgunin er flóknari, má segja.   Reynir að lesa plan andstæðingana með því að skoða video, finna veika hlekki,  og aðlaga leik sinna manna að mótherjunum hverju sinni o.s.frv.

Jafnframt er varnarleikurinn öðruvísi.  Fyrrverandi landsliðsþjálfari lét oftast leika flata 6:0 vörn en Guðmundur er með allskyns útfærslur þar sem varnarmenn koma út á móti andstæðingnum og getur sú varnarstrategía orðið mjög fræðileg. 

Það er greinilegt að Guðmundur hefur mikinn metnað með danska liðið.  

Danska liðið er skipað gríðarlega sterkum einstaklingum þó vissulega séu líka veikir punktar og er stundum nefnt leikstjórnendahlutverkið.  Velta sumir fyrir sér hvernig Guðmundur muni leysa það til lengri tíma en Danmörk er á leiðini á HM eftir áramót.